سويق الذيب: “صفوا النفوس”.. الكل فائز في شاعر ليبيا

علّق الشاعر أسامة سويق الذيب، الذي شارك في برنامج شاعر ليبيا في نسخته الأولى، على النسخة الثانية التي انتهت الجمعة بفوز محمد اشهوب باللقب.
وقال الذيب في صفحته على “فيسبوك”، إن البرنامج عبارة عن مسابقة فيها تنافس، والتصويت الأكثر هو طريق الفوز، واللجنة لا تستطيع تغيير النتيجة.
وتاليا نص ما كتبه أسامة سويق الذيب:
الاستاذ علي شحات مدرسة شعر ومش محتاج نحكي عن (علم) …….
اللي نبي نقوله ان البرنامج مسابقة والمسابقة تنافس والتنافس طرق ….وطريقة التصويت هي طريقة الفوز . يعني اللجنة ماعندها ذنب ليش الطعن فاللجنة ؟ لوعندك انتقاد لحد من الاساتذة اكتبه مش عيب العيب الطعن في ذمم رجال ماتعرفهم وبعضهم قدم للشعر أكثر مما اتخيل انت….شعراء البرنامج ماعندهم ذنب يعني لما يوقفوا معاك ناسك ويدفعوا رواتبهم بيش تفوز (مثلا) ليش يسبوك ويسبوا عيلتك وقبيلتك ومدينتك (عيب والله)..لو عندك نقد لقصيده او سلوك اكتبه ونستفيدوا (خلوا فيها قدر) … البرنامج حرك بركة الثقافة الراكده ودخل الشعر لبيوت ماكانت تعرفه اصلا وهذا نجاح اثار الجدل وخلانا نحكوا عن الشعر ونزعلوا ونفرحوا بعيد عن كوابيسنا وطوابيرنا….
الخلاصة:
1- من حق اقارب الشاعر يتفاخروا بيه بس راهم يكرهوا فيه الناس دون قصد

2- فرقوا بين النقد والقذف والسب والطعن

3- انا سعيد بمشاركتي ومشاركة (العملاق علي شحات ) ولو اني مش سعيد بنتيجة البرنامج في الموسمين وهذا من حقي وماينتقص من حق الفائزين وفرحتهم وفرحة اهلهم.

4- تمنينا من القناة الكشف عن نسب التصويت وارقام المصوتين بعد البرنامج ليش التكتم؟؟

5- اخيرا فريق عمل البرنامج استمروا وكل شي فيه عيوب بس حاولوا تضحوا علي شان البرنامج لانه والله فكرة عظيمه جدا….

مبروك لكل فائز بما فاز لأن الكل فاز مع اختلاف المكاسب